كيف تنجو – بالكاد – من مجتمع يزعم التغيير وهو يحتاج تغييرًا
المقدمة:
أهلاً بيك في العالم البراق… من بعيد!
مجتمع مدني؟ يعني ناس مفترض عندهم ضمير، شغالين على قضايا إنسانية، بتحركهم الأخلاق مش المصالح…
لكن، يا عزيزي القارئ، دي الصورة في البروشور.
أما الواقع؟ دا فندق بخمس نجوم مبني فوق مقبرة جماعية من المثالية المكسورة.
انا زولة ساي… وعشانك انت، قررت أكتب هذا الدليل.
الدرس الأول: لازم يكون عندك CV، لكن أهم منو يكون عندك “شبكة”
جربت تقدم لمنظمة جديدة؟
جهز سيرة ذاتية فيها كلمات زي: “advocacy”, “community resilience”, “intersectionality”…
لكن عموما ال cv بتاعك ما فارق لأنك بعدين بتكتشف إنو المنظمة اختارت الزول “المدعوم”، ابن عم المديرة، أو واحد “كان معانا في مؤتمر الشباب في شرم الشيخ”.
نصيحة زولة ساي:
خليك صاحي، “المهارات” مفيدة، لكن “العلاقات” أقوى.
الدرس الثاني: ما تحاول تكون أذكى من اللازم… دا مزعج!
لما تقول ملاحظة منطقية في اجتماع: “بس أعتقد المفروض نرجع لأصحاب المصلحة الحقيقيين قبل نكتب التقرير.”
بتلقى سكون غريب.
وبعد الاجتماع، يجوك:”إنتي بتفكري كتير ساي، بس المشروع دا جاهز خلاص، ما عندنا وقت للفلسفة.”
نصيحة زولة ساي:
أحيانا “التغابي” مهارة إدارية.
الدرس الثالث: تعلم فن “البوز” الثوري
ما مهم تكون في الميدان، المهم يكون عندك صور ميدان.
وما ضروري تكون ساعدت ضحايا الحرب، المهم تقول “أنا كنت هناك” وتعملها هاشتاق.
نصيحة زولة ساي:
كلما زادت زاوية التصوير اتسعت فرصة التمويل
الدرس الرابع: المجتمع المدني ما مدني لو إنتي ما من جماعتهم
لبست طرحة؟
سألوك: “إنتي صح نسوية؟”
عندك صوت هادي؟
قالوا: “إنتي Passive، ما بتنفعي مع الحراك.”
سألتي عن توزيع الموارد؟
اتهموك إنك “بتخربي الروح الجماعية.”
نصيحة زولة ساي:
إلبسي قناع “الملائمة”.
الدرس الخامس: تمويل، تمويل، تمويل
كل شيء في المجتمع المدني مربوط بكلمة سحرية: “proposal”
لو proposal بتاعك ناعم، بتلقى تمويل.
لو واقعي… الناس بتهرب.
نصيحة زولة ساي:
ما تحلم بالتغيير، اكتب مشروع صغير عنه وخلِّي التمويل يشتغل.
